လမ်းလျှောက်သွားကြတာပေါ့
၁၉၈၂တုန်းကပေါ့၊ဇာတိမြို့ရေကြည်ကနေရန်ကုန်ကိုလာဖို့ခုလို ကားလမ်းတွေမပေါက်သေးတဲ့အချိန်၊ ရထားနှစ်တန် သင်္ဘောတစ်တန်စီးလာခဲ့တော့လူတွေလည်းနုံးချိနေပြီ၊ရထားပေါ်ကအထုပ်တွေချ၊ အဖေကကားသွားငှား၊ပြန်လာတော့လေးဘီးကားလို့ခေါ်ကြတဲ့mazda b600 ကားလေးပေါ်မိသားစု၆ယောက်နဲ့ အထုပ်တွေတင်လို့ တည်းခိုမယ့်သရက်တောကျောင်းတိုက်ဝန်းထဲက အုတ်လှေခါးကျောင်းဆီ သွားခဲ့ကြတာပေါ့၊ဒါရန်ကုန်မှာပထမဆုံးကားစီးဘူးတာပါ။
နောက်တစ်နေ့မနက်စောစောရွှေတိဂုံဘုရားသွားဖူးကြတော့ သုံးဘီးကားလေးစီးလို့၊ကျွန်တော်တို့ ညီအကိုလေးယောက်ပျော်လို့၊နယ်မှာဒီလိုကားနဲ့ပျော်ပျော်ပါးပါးသွားလို့မှမရတာကိုး၊မြောက်ဥက္ကလာ ကဦးလေးအိမ်သွားတော့ သစ်သားဘတ်စ်ကားအိုကြီးစီးလို့၊ကားတွေကခုလောက်မများသေးဘူး၊ မီးပွိုင့်ေ၇ာက်လို့ ကားတွေရပ်နေ၊မီးပွိုင့်က အစိမ်း အ၀ါ အနီမီးလုံးတွေကိုငေးကြည့်ကြ၊မီးပွီုင့်က မစိမ်းသေးဘူးဒရိုင်ဘာက လီဗာကိုခပ်ပြင်းပြင်းနင်းထား ၊စိမ်းတာနဲ့ဝူးကနဲမောင်းထွက်တော့ ကျွန်တော်တို့တွေက တော်လိုက်တာနော် မီးစိမ်းမှာကိုကွက်ထိသိတယ်ပေါ့၊ကလေးဘ၀က အားကျခဲ့ပုံများ။ နယ်ကကားဆရာတွေနဲ့တော့ကွာပါ့ပေါ့၊နယ်မှာက ဂီယာတံကိုတုတ်ထောက်မောင်းတဲ့ ကားတွေနဲ့ ကြီးပြင်းခဲ့ရတာလေ။
တစ်ခါက ရေကြည်ကိုလျှပ်စစ်ဓါတ်အားပေးစက်ရုံလာဆောက်တဲ့ ဂျပန်အင်ဂျင်နီယာက သစ်သားဘော်ဒီနဲ့ ဂီယာတုတ်ထောက်မောင်းနေတဲ့ကားတွေကိုကြည့်ပြီး အမှတ်တရ ဓါတ်ပုံတွေရိုက်သွားတာကြည့်ခဲ့ဘူးတယ်၊ သူတို့မျက်လုံးတွေက ထူးထူးဆန်းဆန်း စိတ်ဝင်စားနေကြတယ်။သူတို့ဆီမှာမရှိတော့တဲ့ကားတွေကိုဒီလို ရအောင်မောင်းနေကြတာကို ထူးဆန်းလို့ပေါ့။
ကလေးဘ၀တုန်းကတော့ လိုချင်တာကိုစိတ်နဲ့အားလုံးရခဲ့တယ်၊အုန်းလက်တစ်ချောင်းဟာ မြင်းလည်းဖြစ်၊ နွားလည်းဖြစ်၊ငှက်ပျောလက်ဟာသေနတ်ပဲ၊ဓါတ်ခဲနဲ့လုပ်ထားတဲ့ကားဟာ မောင်းချင်တဲ့နေရာမောင်းလို့ ရတယ်၊စာရွက်ပေါ်မှာခဲတံနဲ့ဆွဲထားတဲ့ကားတွေအများကြီးပိုင်ခဲ့တာပေါ့၊
အဖေ့အသိတစ်ယောက်ရဲ့ဖင်မလီယာကားလေးနဲ့ရန်ကုန်မြိုကအနှံ့လျှောက်လည်တော့ နောက်ဖုံးထဲမှာ ထိုင်ခဲ့ရတာလေးကလည်း အမှတ်ရစရာပေါ့၊ရန်ကုန်မှာဒီလိုကားတစ်စီးနဲ့လျှောက်လည်ခွင့်ရတာ အဲ့ဒီ အချိန်ကကံကောင်းတယ်ပေါ့လေ။နောက်အဖေ့မိတ်ဆွေတစ်ယောက်ရဲ့ဒေါ့ဂျစ်ကားကြီးနဲ့ကျတော့ ပိုလို့မှ ပျော်စရာကောင်း၊ညီအကိုလေးယောက် ကားပေါ်မှာဆော့လို့၊ခုန်လို့။
အဖေ့တပည့်တစ်ယောက်ကားကတော့ အမိုက်စား၊အနက်ရောင်ဆလွန်းကားကြီးနဲ့ပဲခူးလိုက်ပို့၊ဘုရားစုံဖူး၊ သူပြောတာကတော့ဝယ်ထားတာမဟုတ်ဘူးတဲ့၊ငှားစီးတာဆိုလား၊အဲဒိအချိန်ကထူးထူးဆန်းဆန်းစကားကြားရတာပေါ့၊အဲ့သလိုငှားစီးလို့ရတာကိုသိမှမသိတဲ့အရွယ်လေ။
အမှတ်ရစရာတွေပါ၊မိသားစုတွေကိုသည်းခံပြီး ဒီလောက်မျောက်ရှုံးအောင်ဆော့တဲ့ သားလေးယောက်ကို တစ်ချက်မဆူဘဲ ရန်ကုန်မြို့အနှံ့လိုက်ပို့ပေးတဲ့အဖေလည်းကွယ်လွန်ခဲ့တာ၁၆နှစ်ရှိပြီ၊သတိရနေတုန်းပါအဖေ၊ ခုနေများအဖေရှိခဲ့ရင် ယာဉ်ကြောဒီလောက်ပိတ်နေတဲ့ရန်ကုန်မှာ ကျွန်တော်တို့ကိုဘယ်လို လိုက်ပို့မလဲဆိုတာ သိချင်လိုက်တာ။
ကျွန်တော့်အထင်
သားတို့ရေ ကားစီးမယ့်အစား၊လမ်းလျှောက်သွားကြတာပေါ့ လို့
ပြောမှာသေချာပါတယ်…
သော်ဇင်အုန်း
၃.၁၀.၁၉၉၉မှာကွယ်လွန်သွားတဲ့ချစ်ဖေဖေဦးတင်အုန်းကိုသတိရလျက်
No comments:
Post a Comment